 開心一籮
|
|---|
|
|
鑑於早前推出既 [電話查詢軼事I] 得到各方好友吹捧，本人今次再修錄幾個滿有趣Case同大家分享!!
本人經過數月來既統計，發現另類客戶一般可分為三類：
有牛頭唔搭馬咀形，鄉音未清形，以及私自翻譯形，以下是本人之親身經歷....
Case 1. 牛頭唔搭馬咀形 本人：「你好，電話查詢，請問有咩幫到你?」 亞嬋：「唔該豐明銀行呀!」 本人：「請問要邊區呢?」 亞嬋：「有邊區呀?」 本人：「有銅鑼灣，中環，尖沙咀，屯門」 亞嬋：「咁要元朗啦!」 本人：「小姐，唔好意思，無元朗區喎!」 亞嬋：「下? 咁有邊區呀? 」 本人：(頂...又講多次)「 係有銅鑼灣，中環，尖沙咀，屯門」 亞嬋：「咁元朗呢?」 本人：(你老闆，本人唔想再拖)「小姐，無元朗區架，或者比最近既屯門分行比你啦」 亞嬋：「唉...咁麻煩架，是但喇!」 本人：(咁唔願意唔好要嘛)「係，請記低號碼....」
Case 2. 鄉音未清形 本人：「你好，電話查詢，請問有咩幫到你?」 亞伯：「唔該蓮學疆屍呀!」 本人：(已經想笑) 「唔好意思，係咪蓮花個蓮呀?」 亞伯：「唔係呀，蓮學個蓮呀!」 本人：(妖...講左等如無講) 「咁係咪學年掉返轉呀?」 亞伯：「都話唔係咯，呢.....蓮學航空個蓮學呀!」 本人：（頂．．．）「聯合呀???」 亞伯：「咪係囉!」 本人：(仲覺得自己啱)「 咁請問疆屍又係咩呢?」 亞伯：「一間間個d疆屍呀!」 本人：(本人被激得半死)「 哦! 公司係話?! 請記低號碼啦....」
Case 3 鄉音未清形 本人：「你好，電話查詢，請問有咩幫到你?」 亞嬋：「唔該要徐若瑄電話呀! 係交易廣場架! 」 本人：「(猛抓頭皮，徐若瑄黎左香港咩???)小姐,請問係私人定公司電話架?」 亞嬋：「唔係呀! 係酒家黎架!」 本人：(酒家??? 本人靈機一觸)「係咪翠玉軒呀?」 亞嬋：「係呀，唔該!!」 本人：(笑到面都紅埋)「請記低號碼....」
Case 4 私自翻譯形 本人：「你好，電話查詢，請問有咩幫到你?」 亞叔：「唔該觀塘區既愛迪特呀! 」 本人：「請問係咪愛心個愛，超人迪加個迪，特別個特呢?」 亞叔：「係, 無錯!」 本人：「唔好意思，無呢個名登記喎!」 亞叔：「無理由喎，好大間公司黎喎!」 本人：「先生，咁或者有無英文名架!」 亞叔：「有，我串比你聽，係 A....D....I....D....A....S」 本人：(唉....一早講啦)「哦! Adidas呀! 請記低號碼....」
|
